Як вынікае з апублікаванай на Нацыянальным праўным інтэрнэт-партале Беларусі пастановы Міністэрства адукацыі, вызначаныя асаблівасьці арганізацыі дзейнасьці аздараўленчых цэнтраў і лягераў цяпер абавязковыя і для прыватных установаў.
«Выхаваньне моладзі ў духу патрыятызму, любові да Радзімы і павагі да яе гісторыі» стала адной з задачаў выхаваўча-аздараўленчых установаў.
Пасьля падзеяў 2020 году, калі ў краіне прайшлі масавыя акцыі пратэсту супраць фальсыфікацыі вынікаў выбараў, улады Беларусі ўва ўсіх сфэрах дзейнасьці дзяржавы ўзмацнілі ідэалягічную працу. На кожным прадпрыемстве ў кіраўніцтве абавязкова ёсьць намесьнік у ідэалягічнай працы, а ў школах пачалі праводзіць «патрыятычныя мерапрыемствы» вайсковай накіраванасьці, зьвязаныя з Другой усясьветнай вайной.
У траўні 2024 году прэсавая служба ўнутраных войскаў МУС Беларусі паведаміла аб стварэньні дабрачыннага фонду «Маладая гвардыя», які прыцягвае сродкі для вайскова-патрыятычных клюбаў.
«Патрыятычнае выхаваньне» закранула ў тым ліку і ўкраінскіх дзяцей, якіх Расея незаконна вывозіла ў Беларусь. У кастрычніку 2024 году праваабаронцы апублікавалі даклад «Скрадзенае дзяцінства», у якім расказалі, як у Беларусі дзяцей з акупаваных Расеяй тэрыторыяў Украіны перавыхоўваюць і мілітарызуюць у інтарэсах расейскай дзяржаўнай палітыкі выкараненьня ўкраінскай нацыянальнай і культурнай ідэнтычнасьці.
Форум