За палову сьнежня 2025 году Польшча зафіксавала ў 2,5 разы менш спробаў парушэньня мяжы зь Беларусі, чым летась за той жа пэрыяд

Пра гэта сьведчыць аналіз штодзённых зьвестак польскай памежнай службы, праведзены інфармацыйным агенцтвам «Позірк».

Спробы парушэньня мяжы назіраліся толькі па выніках 3-х з 15-ці дзён гэтага месяца (1, 10 і 11 сьнежня — 3, 1 і 186 адпаведна). У першай палове сьнежня летась спробы былі штодзённымі.

Паводле «Позірку», ёсьць імавернасьць, што польскі бок фіксуе спробаў нелегальнага перасячэньня мяжы не з-за зьніжэньня міграцыйнага ціску, а з прычыны зьмены тактыкі мігрантаў.

Напрыклад, найбольшую ў гэтым месяцы колькасьць спробаў пранікненьня — 186 — Польшча зафіксавала ў дзень, калі быў знойдзены падкоп. Не выключана, што падземных шляхоў больш, чым выявілі памежнікі, і мігранты таемна ідуць празь іх, а не спрабуюць штурмаваць польскі плот на мяжы з Беларусьсю.

ГЛЯДЗІЦЕ ТАКСАМА:

Польскія памежнікі знайшлі падкоп даўжынёй у дзясяткі мэтраў пад мяжой зь Беларусьсю

Літва за 15 дзён сьнежня папярэдзіла 5 спробаў незаконнага перасячэньня мяжы з беларускай тэрыторыі (за той жа пэрыяд летась — 18; зьніжэньне ў 3,6 разы), Латвія — 61 (рост у параўнаньні з адпаведным пэрыядам 2024 году на 42%)

З пачатку году суседнія краіны Эўразьвязу зафіксавалі 42 539 спробаў парушэньня мяжы з боку Беларусі, у тым ліку Польшча — 29 025 (зьніжэньне ў параўнаньні з адпаведным пэрыядам 2024 году на 2.5%), Латвія — 11 902 (рост у 2,2 разы ў параўнаньні з 11.5 месяцаў 2024 году), Літва — 1612 (рост у 1,7 разы).

Міграцыйны крызіс на межах Беларусі і краінаў ЭЗ працягваецца зь вясны 2021 году. Улады суседніх эўрапейскіх дзяржаў лічаць яго «гібрыднай атакай», арганізаванай рэжымамі ў Менску і Маскве.

Аляксандр Лукашэнка неаднаразова заяўляў, што беларускія памежнікі ня будуць спыняць нелегальную міграцыю, бо мігрантаў нібыта «паклікалі ў ЭЗ».

ГЛЯДЗІЦЕ ТАКСАМА:

У Польшчы ня лічаць устойлівай тэндэнцыю да зьніжэньня міграцыйнага ціску зь Беларусі. Буфэрную зону захоўваюць